ఇంటిపనులు చేయలేదని విడాకులా? Surya News

Reading Time: < 1 minute

సమాజంలో మహిళల పాత్ర వేగంగా మారుతున్న ఈ కాలంలో, ఇంటి పనులు ఒక్క భార్య బాధ్యత మాత్రమే కాదని సుప్రీంకోర్టు స్పష్టం చేసింది. భార్య ఇంటి పనులు చేయడం లేదని ఆరోపిస్తూ ఓ భర్త విడాకులు కోరిన కేసులో దేశ అత్యున్నత న్యాయస్థానం కీలక వ్యాఖ్యలు చేసింది.

ఈ కేసులో ముందుగా కింది కోర్టు భర్తకు అనుకూలంగా విడాకులు మంజూరు చేయగా, అనంతరం కర్ణాటక హైకోర్టు ఆ ఉత్తర్వును రద్దు చేసింది. ఈ నేపథ్యంలో భర్త సుప్రీంకోర్టును ఆశ్రయించాడు. విచారణ సందర్భంగా పిటిషనర్ తరఫు న్యాయవాది, భార్య ఇంటిపనులు చేయకుండా ఇబ్బంది పెడుతోందని వాదించాడు.

అయితే ఈ వాదనపై స్పందించిన సుప్రీంకోర్టు ధర్మాసనం, భార్య ఇంటి పనులు చేయకపోవడాన్ని క్రూరత్వంగా పరిగణించడం సరైనది కాదని స్పష్టం చేసింది. జస్టిస్ విక్రమ్ నాథ్, జస్టిస్ సందీప్ మెహతాతో కూడిన బెంచ్ భర్తను తీవ్రంగా ప్రశ్నించింది. ‘‘వంట చేయడం, బట్టలు ఉతకడం, ఇల్లు శుభ్రం చేయడం వంటి పనులు కేవలం భార్య బాధ్యతలు కావు. కాలం మారింది. భార్యాభర్తలు ఇద్దరూ కలిసి ఈ పనులను పంచుకోవాలి’’ అని వ్యాఖ్యానించింది.

ఇంకా, ‘‘మీరు పని చేసే వ్యక్తిని కాదు, జీవిత భాగస్వామిని పెళ్లి చేసుకున్నారు. భార్య ఇంటిపనులు చేయలేదని విడాకులు కోరడం సమంజసం కాదు’’ అని కోర్టు గట్టిగా చెప్పింది. వివాహం అనేది పరస్పర సహకారం, బాధ్యతల పంచుకునే బంధమని, ఇంటి పనుల్లో భర్తలు కూడా సమానంగా సహాయం చేయాలని సూచించింది.

ఈ కేసులో ఇరువురు ఉపాధ్యాయులని కోర్టు గమనించి, తదుపరి విచారణకు ఇద్దరూ హాజరుకావాలని ఆదేశించింది. తదుపరి విచారణను ఏప్రిల్ 27కు వాయిదా వేసింది.

Disclaimer : ఈ సమాచారం కోర్టు విచారణలో వెల్లడైన అంశాల ఆధారంగా ఇవ్వబడింది. కేసు తుది తీర్పు ఆధారంగా మార్పులు ఉండే అవకాశం ఉంది.