30 వేల ఉద్యోగాల తొలగింపు వార్తలపై Oracle స్పష్టం

Reading Time: 2 minutes

Oracle కంపెనీపై ఇటీవల మార్కెట్‌లో పెద్ద చర్చ జరిగింది. విశ్లేషకుల అంచనాల ప్రకారం Oracle సుమారు 30,000 ఉద్యోగాలను తొలగించే అవకాశముందని వార్తలు రావడంతో, దీనిపై కంపెనీ స్పందించింది. ఈ వార్తల్లో నిజం లేదని కాకపోయినా, తమ వైపు నుంచి స్పష్టమైన క్లారిఫికేషన్ ఇచ్చింది.

Oracle తన అతి పెద్ద AI భాగస్వామి అయిన OpenAIతో ఉన్న సంబంధం గురించి స్పష్టం చేసింది. Oracle–OpenAI భాగస్వామ్యానికి సంబంధించి బయట వినిపిస్తున్న NVIDIA–OpenAI మధ్య ఉన్న దాదాపు 100 బిలియన్ డాలర్ల డీల్‌కు తమకు ఎలాంటి సంబంధం లేదని Oracle తెలిపింది. ఆ డీల్ ఇప్పటికీ పూర్తిగా ముగియలేదని, అయినప్పటికీ అది OpenAIతో Oracleకి ఉన్న ఆర్థిక సంబంధాలపై ఎలాంటి ప్రభావం చూపదని కంపెనీ స్పష్టంగా పేర్కొంది.

ఈ క్లారిఫికేషన్ తర్వాత Oracle షేర్ ధరల్లో కొంత తగ్గుదల కనిపించింది. పెట్టుబడిదారులు Oracle భారీగా AI రంగంలో పెట్టుబడులు పెడుతున్న నేపథ్యంలో ఆర్థిక ఒత్తిడి పెరుగుతుందేమోనని ఆందోళన వ్యక్తం చేశారు. గత రెండు నెలల్లో Oracle సుమారు 58 బిలియన్ డాలర్ల మేర బ్యాంక్ అప్పులు తీసుకున్నట్లు సమాచారం. దీంతో కంపెనీ మొత్తం అప్పు 100 బిలియన్ డాలర్లను దాటినట్టు తెలుస్తోంది.

ఉద్యోగాల కోత విషయానికి వస్తే, మార్కెట్ విశ్లేషకుల అంచనాల ప్రకారం Oracle 20,000 నుంచి 30,000 వరకు ఉద్యోగాలను తగ్గించే ఆలోచనలో ఉండొచ్చని చెబుతున్నారు. ఇలా చేస్తే కంపెనీకి 8 నుంచి 10 బిలియన్ డాలర్ల వరకు నగదు ప్రవాహం మెరుగుపడే అవకాశం ఉందని, ఈ డబ్బును భారీ AI డేటా సెంటర్ల నిర్మాణానికి ఉపయోగించవచ్చని అంచనా వేస్తున్నారు. అంతేకాదు, కొన్ని అమెరికన్ బ్యాంకులు Oracle డేటా సెంటర్ ప్రాజెక్టులకు ఫైనాన్స్ ఇవ్వడంలో వెనుకడుగు వేయడంతో, కంపెనీపై ఆర్థిక ఒత్తిడి మరింత పెరిగినట్టు సమాచారం.

ఈ అన్ని వార్తల మధ్య Oracle ఒక విషయాన్ని బలంగా చెప్పింది. NVIDIA–OpenAI మధ్య ఉన్న డీల్ తమకు OpenAIతో ఉన్న ఆర్థిక సంబంధాలపై ఎలాంటి ప్రభావం చూపదని, OpenAI అవసరమైన నిధులను సమీకరించగల సామర్థ్యంపై తమకు పూర్తి నమ్మకం ఉందని కంపెనీ స్పష్టం చేసింది. మొత్తంగా చూస్తే, ఉద్యోగాల కోతపై ఊహాగానాలు కొనసాగుతున్నప్పటికీ, OpenAI భాగస్వామ్యం విషయంలో మార్కెట్‌లో ఉన్న సందేహాలకు Oracle క్లారిటీ ఇచ్చినట్టుగా కనిపిస్తోంది.