అబుదాబి రియల్ ఎస్టేట్ మార్కెట్ కుప్పకూలుతుందా..? గంటల్లో కోట్ల నష్టం Surya News

Reading Time: 2 minutes

ప్రపంచంలోని సంపన్నులకు ప్రముఖ కేంద్రంగా పేరుగాంచిన అబుదాబి రియల్ ఎస్టేట్ మార్కెట్‌లో అనూహ్య పరిణామాలు చోటుచేసుకుంటున్నాయి. ఇప్పటివరకు ఆకాశాన్నంటేలా పెరిగిన ప్రాపర్టీ ధరలు ఇప్పుడు ఒక్కసారిగా పడిపోతుండటం ఇన్వెస్టర్లను ఆందోళనకు గురిచేస్తోంది. కేవలం కొన్ని గంటల వ్యవధిలోనే కోట్ల రూపాయల విలువ తగ్గిపోవడం మార్కెట్‌లో భారీ పతనం సంకేతాలుగా కనిపిస్తున్నాయని నిపుణులు చెబుతున్నారు.

అల్ జుబైల్ ఐలాండ్‌లోని అత్యంత విలాసవంతమైన నాలుగు బెడ్‌రూమ్ విల్లా ధర ఒక్క గంటలోనే భారీగా పడిపోయింది. సుమారు 8,395 చదరపు అడుగుల విస్తీర్ణం గల ఈ విల్లా ధరను 817,000 డాలర్లు అంటే దాదాపు రూ.7 కోట్లు తగ్గించారు. 78 రోజులుగా అమ్మకానికి పెట్టినా కొనుగోలుదారులు ముందుకు రాకపోవడంతో యజమాని చివరకు ధరను సుమారు 25 శాతం వరకు తగ్గించాల్సి వచ్చింది. ముందుగా రూ.28 కోట్లుగా ఉన్న ఈ విల్లా ఇప్పుడు రూ.21 కోట్లకు పడిపోయింది.

సాదియాత్ ఐలాండ్‌లోని లూవర్ అబుదాబి రెసిడెన్సెస్‌లో ఉన్న రెండు బెడ్‌రూమ్ అపార్ట్‌మెంట్ ధర కూడా భారీగా తగ్గింది. కేవలం ఒక గంటలోనే 436,000 డాలర్లు అంటే సుమారు రూ.3.67 కోట్లు తగ్గింది. 57 రోజులుగా మార్కెట్‌లో ఉన్నప్పటికీ కొనుగోలుదారులు లేకపోవడంతో యజమానులు 17.2 శాతం వరకు ధర తగ్గించాల్సి వచ్చింది. ఈ రెండు ప్రాపర్టీల వల్లే కొన్ని గంటల్లో దాదాపు రూ.10 కోట్లకు పైగా సంపద ఆవిరైపోయింది.

తాజా గణాంకాల ప్రకారం అబుదాబిలోని 3,605 ప్రాపర్టీలను పరిశీలించగా ఒక్క రోజులోనే 43 ప్రాపర్టీల ధరలు భారీగా తగ్గాయి. సగటున 4.4 శాతం వరకు ధరలు పడిపోయాయి. కొన్ని ప్రాపర్టీలలో అయితే 25 శాతం వరకు తగ్గుదల నమోదైంది. మొత్తంగా ఒక్క రోజులోనే దాదాపు రూ.33 కోట్లకు పైగా ఆస్తి విలువ తగ్గినట్లు సమాచారం.

దుబాయ్, అబుదాబి రియల్ ఎస్టేట్ మార్కెట్‌లలో భారీగా పెట్టుబడులు పెట్టే భారతీయులకు ఈ పరిస్థితి హెచ్చరికగా మారుతోంది. ప్రస్తుతం మార్కెట్‌లో సప్లై పెరిగిపోవడం, డిమాండ్ తగ్గిపోవడం వల్ల ప్రాపర్టీ ధరలు పడిపోతున్నాయి. ఇదే ట్రెండ్ కొనసాగితే మధ్యప్రాచ్య రియల్ ఎస్టేట్ మార్కెట్‌లో పెద్ద పతనం సంభవించే అవకాశం ఉందని విశ్లేషకులు అంచనా వేస్తున్నారు.

Disclaimer : ఈ కథనంలో పేర్కొన్న సమాచారం వివిధ మార్కెట్ నివేదికలు మరియు అందుబాటులో ఉన్న డేటా ఆధారంగా అందించబడింది. పెట్టుబడులకు సంబంధించిన నిర్ణయాలు తీసుకునే ముందు నిపుణుల సలహా తీసుకోవడం మంచిది.