కొండాపూర్ అపార్ట్‌మెంట్‌లో ఐటీ ఉద్యోగిని ఆత్మహత్య.. పోలీసుల దర్యాప్తు Surya News

Reading Time: < 1 minute

హైదరాబాద్ నగరంలోని కొండాపూర్ ప్రాంతంలో విషాద ఘటన చోటుచేసుకుంది. సుమధుర అపార్ట్‌మెంట్‌లో నివసిస్తున్న మనుశ్రీ (32) అనే సాఫ్ట్‌వేర్ ఉద్యోగిని ఉరివేసుకొని ఆత్మహత్య చేసుకుంది. కర్ణాటకకు చెందిన ఆమె నగరంలోని ఒక ఐటీ సంస్థలో పనిచేస్తూ కొండాపూర్‌లో నివాసం ఉంటోంది.

ఆదివారం రాత్రి నుంచి మనుశ్రీ ఫోన్ కాల్స్‌కు స్పందించకపోవడంతో ఆమె తల్లిదండ్రులు ఆందోళనకు గురయ్యారు. దీంతో ఆమె పక్క గదిలో నివసిస్తున్న స్నేహితురాలికి సమాచారం ఇచ్చి పరిస్థితి తెలుసుకోవాలని కోరారు. సోమవారం ఉదయం ఆమె స్నేహితురాలు గదికి వెళ్లి చూడగా తలుపులు లోపల నుంచి మూసి ఉన్నట్లు గుర్తించింది.

సందేహం కలగడంతో తలుపులు బద్దలు కొట్టి లోపలికి వెళ్లి చూడగా మనుశ్రీ ఫ్యాన్‌కు ఉరివేసుకొని కనిపించింది. వెంటనే స్థానికులకు సమాచారం అందించడంతో గచ్చిబౌలి పోలీసులు సంఘటనా స్థలానికి చేరుకుని మృతదేహాన్ని స్వాధీనం చేసుకున్నారు.

పోస్టుమార్టం నిమిత్తం మృతదేహాన్ని ఉస్మానియా ఆసుపత్రికి తరలించారు. ప్రాథమిక సమాచారం ప్రకారం పని ఒత్తిడి కారణంగా ఆమె ఈ నిర్ణయం తీసుకుని ఉండవచ్చని పోలీసులు భావిస్తున్నారు. ఈ ఘటనపై కేసు నమోదు చేసి దర్యాప్తు కొనసాగిస్తున్నారు.

Disclaimer : ఈ వార్త అందుబాటులో ఉన్న ప్రాథమిక సమాచారం ఆధారంగా రూపొందించబడింది. దర్యాప్తు పూర్తయ్యే వరకు వివరాల్లో మార్పులు చోటుచేసుకునే అవకాశం ఉంది.